Kikkuuvugut

NUNAOIL A/S tassaavoq Kalaallit Nunaanni nunami namminermi uuliasiorfiutileqatigiiffik, aammalu 100%-imik Namminersorlutik Oqartussanit pigineqarluni. Suliassaraarput Namminersorlutik Oqartussat sinnerlugit Kalaallit Nunaata nunavittaani misissuinermut qalluinermullu pisinnaatitsissutini suliaqartuunngitsutut suleqataasutut peqataanissaq.

Ingerlatseqatigiiffik misissuinerup immikkoortuani akiliunneqarluni suleqataavoq, taamaalillunilu Kalaallit Nunaat misissuinermik ingerlatani akiliinani peqataasarpoq. NUNAOIL-ip peqataanera allatigut pisinnaatitsissutini suleqatigisat allat naligalugit atugassarititaasut tunngavigalugit pisarpoq.

Pisinnaatitsissummi suleqataasutut pisinnaatitsissutini teknikkikkut aningaasaqarnikkullu komité-ni issiaqataasarpugut aammalu taanna aqqutigalugu pisinnaatitsissutini ataasiakkaani misissuinermik suliaqarnerup taakkualu akimorlugit siumut ingerlaneranut pingaaruteqartuni aalajangiinerni aalajangeeqataasarluta, taamaalillutalu ingerlatseqatigiiffimmut aamma Kalaallit Nunaannut iluaqutaasumik misissuinernut pitsaanerpaamik qulakkeereqataasarluta.

Suliaqarluta suleqataavugut, Kalaallit Nunaanni nunap ilua pillugu aammalu ingerlatanut ingerlanneqartunut asseqanngitsumik ilisimasaqarluta, aammalu pisinnaatitsissutini siumut ingerlatsineq sulissutigalugu. Ilisimasat ingerlatseqatigiiffimmi nunap sannaanut paasissutissanik nalunaarsukkanik nassuiaanermik ulluinnarni suliaqarnitsinni pilertartut naleqarnerat, suleqatigisartakkavut qanimut suleqatigalugit misissuinermik suliniuteqarnerup ingerlaqqinnerani niuernermik tunngaveqartumik nassaarnissamik aqqutissaasinnaasunik periarfissiisarput tunngavissiisarlutillu.